ᐅᓪᓗᕆᐊᑦ ᓯᕆᕕᐅᑉ ᐅᕕᒃᑲᓂᒃ ᓂᕿᑐᐃᓐᓇᓕᕆᓂᕐᓄᑦ ᐱᓇᓱᒐᖓ ᐱᓇᓱᐊᕐᑎᓱᒋᑦ ᐅᕕᒃᑫᑦ ᑲᒪᖃᑕᐅᑎᑦᓱᒋᑦ ᐅᓄᕐᓯᐅᒥᑎᑦᓯᒋᐊᕐᓂᐅᑎᓗᒍ ᐃᓄᐃᑦ ᓂᕿᓄᑦ ᐱᐅᓯᑐᖃᖓᑕ ᓄᐃᑕᑎᑕᐅᖏᓐᓇᓂᖓ. ᓄᓇᒥ ᒪᙯᑦᑎᓯᓲᑦ ᐊᒻᒪᓗ ᑲᑎᒪᑎᑦᓯᕙᑦᓱᑎᒃ ᖃᐅᔨᒪᔪᑦ ᒪᓂᔨᕙᑦᑎᓗᒋᑦ ᐅᕕᒃᑲᓂᒃ ᐆᒪᔪᕐᓯᐅᓂᑎᒍᑦ ᒪᙯᓐᓂᑎᒍᑦ ᐱᓯᑎᖕᖑᕈᑎᒋᓂᐊᕐᑕᖏᓐᓂᒃ, ᐃᒻᒥᓂᒃ ᐱᔪᓐᓇᓯᐊᕐᓂᒥᓂᒃ ᐃᑉᐱᒍᓱᓕᕈᑎᒋᓂᐊᕐᑕᖏᓐᓂᒃ ᐊᒻᒪᓗ ᓂᕿᑐᐃᓐᓇᓂᒃ ᐊᑐᐃᓐᓇᖃᕐᓂᓴᐅᑎᑦᓯᒋᐊᕐᓂᒥᒃ.
ᓄᓇᒦᒋᐊᒥᒃ ᑐᕃᓐᓇᑐᓂᒃ ᐱᕙᓪᓕᖁᑎᐅᕗᖅ ᐃᓱᒪᒃᑯᑦ ᖃᓄᐃᖕᖏᓯᐊᕐᓇᑐᓂᒃ ᐃᑉᐱᒍᓱᓕᕐᓇᓱᓂ ᓲᖑᓂᕐᓴᖑᕐᓱᒍᓗ ᐃᓗᒡᒍᓯᑎᒍᑦ ᑭᓇᐅᓂᕐᒥᒃ ᖃᐅᔨᒪᑦᓯᐊᓂᖅ ᐊᒻᒪᓗ ᐱᕙᓪᓕᓚᕿᑦᓱᒍ ᐃᓚᒋᔭᐅᒋᐊᒥᒃ ᐃᑉᐱᒍᓱᓐᓂᖅ. ᑐᑭᓯᒪᔪᒍᑦ ᐃᓚᖏᑦ ᒪᙯᒍᒪᒐᓗᐊᕐᓱᑎᒃ ᒪᙯᓯᑐᐃᓐᓇᖃᔭᓲᒍᖕᖏᓂᖏᓐᓂᒃ, ᑐᕌᒐᕗᑦ ᑖᒃᑯᓂᖓ ᐅᓂᑦᓯᒪᐅᑎᐅᕙᑦᑐᓂᒃ ᐃᑭᓪᓕᑎᕆᒋᐊᕆᐊᖃᕐᓂᑎᓄᑦ ᐊᒻᒪᓗ ᐱᕕᑦᓴᖃᕐᑎᓯᒋᐊᖃᕐᓂᑎᓄᑦ ᓄᓇᓕᒥᐅᓂᒃ ᐃᓚᐅᒍᓐᓇᐸᓪᓗᑎᒃ ᓂᕿᑐᐃᓐᓇᑕᕐᑐᓂᒃ ᐊᓐᓂᑐᕈᑎᓕᓐᓂᒃ!
ᐱᓇᓱᐊᖃᑎᖃᑦᓯᐊᐸᑦᑐᒍᑦ ᐱᓇᓱᐊᓚᐅᕐᕋᑎᒃ ᐃᓕᓐᓂᐊᑎᑦᓯᓂᕐᓄᑦ ᐱᓇᓱᐊᕐᑐᓂᒃ ᐃᓐᓇᓕᒃ ᐃᓕᓴᕐᕕᒥ, ᑭᓯᐊᓂ ᐃᓘᓐᓇᑎᒃ ᐃᓄᑦᔪᐊᒥ ᐅᕕᒃᑫᑦ ᐅᑭᐅᓖᑦ 13-ᓂᑦ 20-ᓄᑦ ᐃᓚᐅᒍᒪᒍᑎᒃ ᐱᓇᓱᐊᒐᕐᒧᑦ ᐃᓱᒪᒥᑦᑎᑕᐅᔪᑦ. ᓄᓇᒦᓕᕋᑦᑕ ᓄᓇᓕᒥᐅᓄᑦ ᓱᖏᐅᓐᓂᖃᑦᓯᐊᑐᓄᑦ ᐆᒪᔪᕐᓯᐅᑎᓄᑦ ᓄᓇᒦᑦᑎᑕᐅᓲᒍᔪᒍᑦ ᑲᑎᒪᑎᑦᓯᓂᕐᓂᓗ ᑐᑦᓯᕋᕈᑎᖃᕐᐸᓱᑕ ᐃᓄᒻᒪᕆᓐᓂᒃ ᐊᒻᒪᓗ ᓄᓇᓕᒥᐅᓂᒃ ᐱᓯᑎᐅᒍᑎᓕᓐᓂᒃ ᓂᕿᑐᐃᓐᓇᓂᒃ ᐆᒪᔪᕕᓂᕐᓂᒃ ᐊᑐᐃᓐᓇᕈᕐᑎᕆᓂᕐᓂᒃ. ᓄᓇᓕᐊᓕᕈᑦᑕ ᒪᓕᒍᒪᒍᕕᑦ, ᐃᓕᓐᓂᐊᑎᑦᓯᒍᒪᒍᕕᑦ, ᐅᕝᕙᓘᓐᓃᑦ ᐃᑲᔪᕈᒪᒍᕕᑦ ᐱᓇᓱᒐᕐᒥᒃ ᐅᕙᑦᑎᓂᒃ ᖃᐅᔨᑎᑦᓯᒍᓐᓇᓯᐊᕐᐳᑎᑦ.
2021-ᒥ ᐊᕿᒡᒋᓯᐅᓚᐅᔪᔪᒍᑦ ᐊᒻᒪᓗ ᓇᑦᓯᓯᐅᕐᓱᑕ, ᐃᖃᓗᑦᓯᐊᓚᐅᔪᑦᓱᑕᓗ ᐃᓲᕋᓕᑦᑖᓂᒃ ᐊᒻᒪᓗ ᐃᓕᓐᓂᐊᑎᑦᓯᓂᖃᕐᑎᓯᑦᓱᑕ ᐊᒪᕈᕐᓂᒃ ᐊᒦᔦᒍᓯᒥᒃ, ᑖᒃᑯᐊ ᐃᓓᓐᓇᑐᐃᓐᓇᖏᑦ ᐱᓇᓱᐊᕐᐸᑕᑦᑕ!
