ᓄᓇᕕᒻᒥ ᐊᐅᔭᖅ ᓀᑦᑐᐊᐱᐅᑦᓱᓂ ᒪᒪᕐᑑᓲᖅ. ᐱᑦᓯᐊᕋᓱᐊᕐᐸᑐᒍᑦ ᐃᑉᐱᒍᓱᑦᓯᐊᕋᓱᐊᕐᓱᑕ ᐊᐅᔭᐅᓂᐊᐱᖓᓂ ᐊᓕᐊᒋᑦᓱᒍ! ᐊᐅᔭᒥ ᕿᑲᕐᓇᐅᑎᓪᓗᒍ ᐃᓄᑦᔪᐊᒥ ᒪᕐᕈᐃᓂᒃ ᐱᒻᒪᕆᐅᑎᓗᒋᑦ ᑭᒡᒐᑐᕈᑎᖃᕐᐸᑐᒍᑦ, ᐅᓪᓛᕈᒥᑕᕋᑦᓴᓕᐅᕐᓂᖅ ᐊᒻᒪᓗ ᐅᕕᒃᑫᑦ ᖃᓄᐃᖕᖏᓯᐊᕐᓗᑎᒃ ᐃᓅᓯᖃᕈᑎᑦᓴᖏᓐᓂᒃ ᐃᓕᓐᓂᐊᑎᑕᐅᓂᖏᓐᓄᑦ ᐱᓇᓱᒐᖅ.
ᖃᐅᔨᒪᔪᒍᑦ ᐃᓕᓴᕐᓇᐅᑉ ᐊᕐᕌᒍᖓᑕ ᐃᓗᐊᓂ ᐃᓕᓵᑦ ᐃᓕᓴᕐᕕᒥ ᐅᓪᓛᕈᒥᑕᓲᒍᒋᐊᖏᓐᓂᒃ, ᐊᒻᒪᓗ ᑌᒣᓲᒍᒐᒥᒃ ᐊᐅᔭᐅᓕᕐᒪᑦ ᑭᓪᓕᖃᓲᑦ ᓂᕆᔭᑦᓭᓘᕐᓂᓴᐅᑦᓱᑎᒃ. ᐅᓪᓛᕈᒥᑕᕐᑎᓯᓂᖅ ᓄᐃᑕᐅᓯᒪᔪᖅ ᑖᒃᑯᐊ ᐱᑦᔪᑎᒋᑦᓱᒋᑦ ᓂᕆᑎᑕᐅᕙᑦᑎᓗᒋᑦ ᐆᓇᕐᑐᓂᒃ ᐅᓪᓛᕈᒥᑕᕐᑎᓱᒋᑦ 9-ᒥᑦ 11-ᒧᑦ ᐃᓘᓐᓇᖏᑦ ᓄᓇᓕᒥᐅᑦ.
ᐅᓪᓗᕆᓂᐊᕐᑕᓯᓐᓂᒃ ᐱᒋᐊᕐᕕᓕᑦᑎᓯᒋᐊᕐᑐᐸᒋᑦᓯ ᐅᕙᑦᑎᓂᒃ ᑏᑐᖃᑎᖃᕆᐊᕐᑐᓗᓯ ᐊᒻᒪᓗ ᐆᓇᕐᑐᓂᒃ ᓂᕆᒋᐊᕐᑐᓗᓯ.
ᖃᓄᐃᖕᖏᓯᐊᕐᓗᓂ ᐃᓅᓯᖃᕐᓂᒧᑦ ᐱᓇᓱᒐᖅ ᐱᕙᓪᓖᒋᐊᕈᑎᒃ ᓈᒻᒪᑐᓂᒃ ᓱᖏᐅᓐᓂᑖᕐᐸᓕᐊᓂᖏᓐᓂᒃ ᐃᓄᑦᔪᐊᒥᐅᑦ ᐅᕕᒃᑫᑦ. ᒪᓂᔨᓲᒍᔪᒍᑦ ᐅᕕᒃᑲᓄᑦ ᐱᓇᓱᐊᕈᓯᑕᒫᑦ ᓱᖃᑦᓯᑎᑦᓱᒋᑦ ᐊᒻᒪᓗ ᑎᒥᒧᑦ ᐱᐅᔪᓂᒃ ᓂᕆᒻᒫᑎᑦᓱᒋᑦ ᐊᐅᔭᓕᒫᖅ. ᓱᖃᑦᓯᑎᑦᓯᒍᑎᐅᓲᑦ ᑎᒥᒥᒍᑦ ᐱᖕᖑᐊᑐᑦ ᐱᓕᐅᑎᑦᓱᑎᒃ, ᓂᕐᓯᐅᓂᖅ, ᐱᕈᕐᓰᓂᖅ ᐊᒻᒪᓗ ᓄᓇᓕᐊᕐᓂᖅ. ᐃᓚᐅᒍᒪᒍᕕᑦ ᑕᑯᒐᓱᐊᕐᐸᒍᒃ Facebook-ᕗᑦ ᖃᐅᔨᒪᖃᑦᑕᓂᐊᕋᕕᑦ ᓱᔪᖃᕐᓂᐊᒪᖔᑦ ᐃᓘᓐᓀᓂ ᓱᖃᑦᓯᑎᑦᓯᒍᑎᑦᑎᓂᒃ ᖃᖓᓗ ᐊᑑᑎᔪᑦᓴᐅᒪᖔᑕ ᖃᐅᔨᓗᑎᑦ.
