ᑎᒻᒥᔫᒃᑯᑦ ᑭᓯᐊᓂ ᑎᑭᑕᐅᓲᒍᒻᒪᑕ ᓄᑖᔦᑦ ᐱᕈᕐᑐᕕᓃᑦ ᓂᖀᑦ ᒪᒪᕈᑎᑦᓴᔭᖏᑦ ᐊᒻᒪᓗ ᐱᕈᕐᑐᕕᓃᑦ ᓂᕆᔭᑦᓭᑦ ᓄᖑᓐᓂᐅᔭᓲᑦ ᓂᐅᕕᕐᕕᓂ ᓯᓚᕐᓂᓗᒻᒧᑦ ᐊᒻᒪᓗ ᐊᒥᓲᓗᐊᕐᖃᔭᓲᒍᒐᑎᒃ ᓱᑦᔪᖑᓂᐅᔭᕿᒧᓪᓗ. ᐅᓄᕐᓯᐅᒥᓯᒪᔪᑦ ᐱᔭᐅᒍᓐᓇᓗᑎᒃ ᓄᑖᔦᑦ ᖃᓄᐃᖕᖏᓯᐊᕐᓇᑐᑦ ᓂᖀᑦ ᐱᖃᕐᑐᒍᑦ ᐊᒻᒪᓗ ᐃᖏᕐᕋᑎᑦᓯᓱᑕ 40-ᓂᒃ ᐃᑕᒐᓐᓂᒃ ᑕᑭᓂᓕᒻᒥᒃ ᐃᒪᕐᒧᑦ ᐱᕈᑦᓯᐊᓂᒃ ᐃᑎᕐᓯᒪᑎᑦᓯᕕᒻᒥᒃ; ᐱᕈᕐᑎᓯᒍᓐᓇᐸᑦᓱᑕ ᓈᒻᒪᑐᓂᒃ ᓄᓇᐅᔭᓂᒃ ᓂᕆᔭᑦᓴᓂᒃ ᓯᕐᒥᑕᖃᕐᑎᓇᒍ ᐃᑦᔨᒥᐅᒐᓗᐊᖅ. ᐱᕈᕐᓰᕕᒃ ᐃᓂᕐᓯᕕᐅᓲᖅ ᓄᓇᐅᔭᓂᒃ ᐱᕈᕐᑐᕕᓂᕐᓂᒃ ᐃᓚᐅᑎᓗᒋᑦ ᖁᖑᓖᑦ ᓄᓇᓕᓐᓂ ᒪᒪᕆᔭᐅᔪᑦ, ᐃᓄᑦᔪᐊᑉ ᓄᓇᖓᓂ ᓇᐹᕐᑐᖃᖕᖏᑐᒥ ᐱᕈᓲᑦᓴᔭᓂᒃ.
ᐃᓱᕐᕆᐅᑎᒻᒪᕆᑦᑎᓂ ᑲᔪᓯᑎᑦᓯᕙᒻᒥᔪᒍᑦ ᒥᑭᔪᒥᒃ ᐃᒪᕐᒥ ᐱᕈᕐᓰᕕᐅᑉ ᓇᐸᔪᑎᒎᕐᑐᒥᒃ ᐊᑐᕐᑕᐅᓲᒍᑎᓪᓗᒍ ᐃᓕᓐᓂᐊᑎᑦᓯᐅᑕᐅᑦᓱᓂ ᐱᓇᓱᐊᕈᑦᔨᐅᑎᑦᑎᓂᒃ. ᐃᒣᒍᓐᓇᐸᑦᓱᑕ, ᐃᒐᓛᒥ ᐱᕈᕐᓰᕕᒃ ᐊᒻᒪᓗ ᓯᓚᒦᑦᑐᖅ ᐸᕐᖄᓯᐅᕐᕕᒃ ᐆᑦᑐᕋᕈᓐᓇᐅᑎᒋᓕᕐᓱᒍ ᓯᕐᒥᒥ ᐱᕈᕐᓰᓂᕐᓂᒃ; ᐱᕈᕐᓯᐊᓴᓕᐅᕐᓯᒪᓕᕐᑐᒍᑦ ᖃᓄᐃᑦᑐᑐᐃᓐᓇᓂᒃ ᑐᒣᑐᓂᒃ ᐊᒻᒪᓗ garlic-ᓂᒃ, broccoli-ᓂᒃ ᐊᒻᒪᓗ ᓄᓂᕚᑦᓴᔭᓂᒃ.
ᐊᑐᕐᐸᑕᕗᑦ ᓂᖀᑦ ᒪᒪᕈᑎᑦᓴᔭᖏᑦ ᐱᕈᕐᑐᕕᓃᑦ ᐊᒻᒪᓗ ᓂᕆᔭᑦᓭᑦ ᓂᕐᓯᐅᓕᕋᑦᑕ, ᐱᓇᓱᐊᕈᑦᔨᐅᑎᑦᑎᓂᓗ ᑲᔪᓯᑎᑦᓯᓱᑕ, ᓄᓇᓕᒥᐅᓄᑦ ᐃᓚᖓᓐᓂ ᐊᑭᓖᑎᓐᓇᒋᑦ ᐊᕕᖃᑎᒋᔭᐅᑎᕙᑦᓱᒋᑦ ᓂᕿᓕᐊᕗᑦ.
ᐱᓇᓱᐊᖃᑎᒌᒍᑎᒋᑦᓯᐊᓱᒍ ᐱᕈᕐᓰᕕᒻᒧᑦ ᐊᒻᒪᓗ ᐃᓄᐃᑦ ᑕᑯᒥᓇᕐᑐᓕᐅᕐᓂᖏᓐᓄᑦ ᐱᓇᓱᒐᖅ ᐃᑲᔪᕐᓯᓯᒪᓕᕐᑐᖅ ᐅᕙᑦᑎᓂᒃ ᐅᓄᕐᓰᒋᐊᕐᓂᑎᒍᑦ ᐊᒻᒪᓗ ᐱᕙᓪᓕᐊᑎᑦᓯᒋᐊᕐᓂᑎᒍᑦ ᐱᕈᕐᓰᓂᕐᓄᐊᖓᔪᓂᒃ ᐱᒋᐊᕐᑎᓯᒍᑎᑦᓴᕗᑦ ᐱᑎᓪᓗᒋᑦ ᐊᒫᓕᐅᕐᓂᓄᑦ ᑎᑭᑦᓱᒋᑦ ᓯᕐᒥᓯᐊᓕᐅᕐᓃᑦ.
