ᐅᓂᒃᑲᐅᓯᕗᑦ
ᑲᒪᒋᔭᖃᑦᓯᐊᓂᓖᑦ ᐃᑲᔪᕈᒪᔪᑦ ᐃᑲᔪᕐᑏᑦ ᐊᒻᒪᓗ ᐆᒻᒪᑎᒥᓂᑦ ᐱᔪᓂᒃ ᓇᓪᓕᓂᓖᑦ ᐱᕈᕐᑎᓯᒋᐊᕐᓯᒪᔪᑦ ᓯᕆᕕᒻᒥᒃ 2013-ᒥ. ᐱᒋᐊᕐᖃᒥᐅᑦᓱᓂ ᓯᕆᕕᐅᑉ ᓄᓇᓕᓐᓂ ᓂᕐᓯᐅᕕᖓᓄᑦ ᐱᓇᓱᒐᖅ ᓄᓇᓕᓐᓂ ᐃᓚᒌᑦ ᐃᓪᓗᖁᑎᖓᓃᑦᑎᓗᒍ; ᐅᐱᓐᓀᓘᕐᑐᑦ ᐃᓄᐃᑦ ᑕᕐᕿᑕᒫᑦ ᓂᕆᔭᑦᓴᓂᒃ ᐃᓄᑦᔪᐊᒥᐅᓂᒃ ᐸᔪᖃᑦᑕᓚᐅᔫᑦ. ᑌᑦᓱᒪᓂ ᖃᐅᔨᒪᓇᓕᓚᐅᕐᓯᒪᔪᑦ ᓄᐃᑕᖏᓐᓇᓚᖓᑎᓪᓗᒍ ᐊᒻᒪᓗ ᐃᑲᔪᕐᓯᓯᒪᒍᓐᓇᓯᐊᕐᑎᓗᒍ ᓂᕿᓄᑦ ᑭᒡᒐᑐᕐᓂᐅᑉ ᓄᓇᓕᓐᓂ ᓄᐃᑕᒋᐊᖃᓕᕐᓂᖓ. ᑕᒐ 5-ᓂ ᐊᕐᕌᒍᓂ ᐱᓚᕿᑎᑦᓯᓯᐊᕐᐸᓂᖓ ᐱᕈᕐᐸᓕᐊᑦᓱᓂ ‘ᓯᕆᕕᒃ ᓂᕆᔭᑦᓴᓕᐅᕐᕕᒃ’ ᐅᒃᑯᐃᖔᕐᓯᒪᓕᕐᑐᖅ ᓇᒻᒥᓂᕐᒥᓂᒃ ᐃᓱᕐᕆᐅᑎᒥᓂᒃ ᐊᒻᒪᓗ ᐃᖏᕐᕋᓂᖃᕐᓯᒪᓕᕐᓱᓂ ᓂᕐᓯᐅᕕᖓ ᐁᐸᔭᓕ 2018-ᒥᓂᑦ!
ᓯᕆᕕᒃ ᐱᒻᒪᕆᖕᖑᐸᓕᐊᓯᒪᔪᖅ ᑌᑦᓱᒪᓂᓂᒥᑦ. ᒣ 2020-ᒥ ᓇᓗᓀᕐᑕᐅᓚᐅᔪᔪᒍᑦ ᖄᖏᕐᓂᑯᓕᐅᕐᑎᐅᒐᑕ ᑎᒥᖕᖑᓱᑕ. ᐊᑎᖃᕈᓐᓀᑎᓯᒪᔭᕗᑦ ‘ᓲᑉᐸᑐᕆᐊᕐᑐᕕᒻᒥᒃ’ ᑐᑭᓯᓇᕐᓂᓴᐅᓯᑎᓗᒍ ᐱᓇᓱᐊᕐᐸᑕᑦᑕ ᐱᒻᒪᕆᐅᓂᕐᓴᖑᕐᓯᒪᓕᕐᓂᖏᑦ ᐱᑦᔪᑎᒋᑦᓱᒋᑦ. ᐃᖏᕐᕋᑎᑦᓱᒍ ᓂᕆᔭᑦᓴᓕᐅᕐᕕᐅᑎᑦᓱᒍ ᒪᓂᔨᒍᓐᓇᐸᓕᕐᑐᒍᑦ ᐅᓄᕐᓂᓴᓂᒃ ᑭᒡᒐᑐᕈᑎᓂᒃ ᐊᒻᒪᓗ ᐊᓯᒐᓴᖏᓐᓂᒃ ᐱᒍᑦᔨᕕᐅᑎᕙᓕᕐᓱᒍ, ᓄᓇᓕᑦᑎᓂ ᓇᓂᕙᑦᓱᒋᑦ ᑲᔪᓯᑎᑕᐅᑦᓯᐊᕈᓐᓇᑐᑦ ᐱᓀᓗᑕᐅᑉ ᐋᕐᕿᐅᑎᑦᓴᖏᓐᓂᒃ ᓂᕆᔭᑦᓭᓘᕐᓂᒧᑦ ᓄᓇᓕᑦᑎᓂ.
ᐊᑎᕗᑦ ᓯᕆᕕᒃ ᐱᓯᒪᔪᖅ ᓂᓪᓕᕈᑎᒋᓲᑦᑎᓂᑦ ᐃᓄᑦᑎᑐᑦ ᓇᑯᕐᓴᓕᑐᐊᕋᑦᑕ ᐊᒻᒪᓗ ᐊᓕᐊᓕᑐᐊᕋᑦᑕ ᓂᕆᖃᑎᒌᓯᒐᑦᑕ.
ᑭᒡᒐᑐᕈᑎᑦᑎᓂᒃ ᐊᓯᑦᔨᑐᐃᕙᓪᓕᐊᕙᑦᑐᒍᑦ ᓱᓕ ᓄᓇᓕᓐᓂ ᑭᖕᖒᒪᓇᕐᑐᑦ ᑕᒡᒐᐅᑎᒋᐊᕐᐸᓱᒋᑦ, ᐃᓄᑦᔪᐊᖅ ᐊᖏᓕᕙᓪᓕᐊᒪᑦ ᐊᒻᒪᓗ ᐊᓯᑦᔨᐸᓪᓕᐊᓱᓂ ᑌᒣᓐᓂᖓᓂᒃ ᒪᓕᑐᐃᓐᓇᓚᖓᑦᓱᑕ. ᑐᓂᕐᕈᓯᕕᒋᑦᓱᒍ ᐃᓄᐃᑦ ᓂᕿᑎᒍᑦ ᐱᐅᓯᑐᖃᖓ ᑖᑦᓱᒥᖓᓗ ᐅᐃᒪᓇᕐᑑᑎᑦᓯᓱᑕ ᑭᖕᖒᒪᒋᔭᕐᑎᒍᑦ ᐊᒻᒪᓗ ᖁᕕᐊᓲᑎᒋᕙᑦᓱᒍ ᐃᓗᒡᒍᓯᕗᑦ ᐊᒻᒪᓗ ᓄᓇᓕᕗᑦ.
