ᓄᑖᖅ ᑲᑐᑦᔮᓕᓐᓂᒃ ᐃᓂᑦᓴᖃᕐᑎᓯᕕᒃ

ᐱᕈᕐᐸᓕᐊᕕᑦᓴᖅ, ᓂᕐᓯᐅᓗᑎᓗ ᐊᒻᒪᓗ ᐊᕕᖃᑎᖃᕐᓗᑎᒃ

ᐃᓄᑦᔪᐊᒥᐅᑦ ᑭᒡᒐᑐᕐᓱᒋᑦ ᐱᓇᓱᐊᒻᒪᕆᑉᐸᓕᕐᑐᒍᑦ ᓄᐃᑕᐅᑎᑦᓯᒋᐊᓚᖓᑦᓱᑕ ᓄᑖᒥᒃ ᓂᕆᔭᑦᓴᓕᕆᕕᒻᒥᒃ. ᐱᑦᔪᑎᖓ ᓄᑖᑉ ᐃᓱᕐᕆᐅᑎᐅᑉ ᐱᕕᓕᒫᖅ ᐅᓄᕐᓰᒋᐊᕈᓐᓇᓛᕐᑐᖅ ᐱᕈᕐᐸᓕᐊᑎᑦᓯᒍᓐᓇᓂᑦᑎᓂᒃ, ᐃᓄᑦᔪᐊᒥᐅᑦ ᐊᒥᓲᓂᕐᓭᑦ ᐃᓚᐅᒍᓐᓇᓯᑎᓗᒋᑦ ᐃᓘᓐᓀᓄᑦ ᓯᕆᕕᐅᑉ ᐱᓇᓱᐊᓲᖏᓐᓄᑦ. ᐱᓇᓱᐊᕐᕕᒃ ᐃᓂᖃᑦᓯᐊᓛᕐᑐᖅ ᓂᕐᓯᐅᕕᐅᒍᓐᓇᓯᐊᕐᓗᓂ ᐊᒻᒪᓗ ᓂᕿᑐᐃᓐᓇᓂᒃ ᐊᑐᐃᓐᓇᕈᕐᑎᕆᒍᓐᓇᕕᐅᓗᓂ. ᐱᑐᑦᓯᒪᓛᕐᑐᖅ ᐅᓪᓗᒥ ᐃᒪᕐᒧᑦ ᐱᕈᕐᓰᕕᐅᓕᕐᑐᒧᑦ, ᐊᒻᒪᓗ ᐃᓚᖃᓛᕐᓱᓂ ᐊᕐᕌᒍᓕᒫᖅ ᓯᕐᒥᒧᑦ ᐱᕈᕐᓰᕕᒻᒥᒃ ᐊᑐᕐᑕᐅᒍᓐᓇᖃᑦᑕᓛᕐᓱᓂ ᓄᓇᓕᒥᐅᑦ ᓇᒻᒥᓂᖅ ᓂᕆᔭᑦᓴᒥᓂᒃ ᐱᕈᕐᓰᒍᓐᓇᓗᑎᒃ.

ᑲᑎᒪᔪᓂᒃ ᐃᓂᖃᕐᑎᓯᕕᒃ

ᓄᑖᖅ ᐃᓱᕐᕆᐅᑎᒃ ᑭᖕᖒᒪᓇᕐᐸᑐᒥᒃ ᓄᐃᑦᓯᓚᕿᐅᑕᐅᓛᕐᑐᖅ ᐊᑐᕈᓐᓀᓇᓛᕐᑐᒥᒃ ᓄᓇᓕᓐᓂ ᐃᓂᖃᕐᑎᓯᕕᒻᒥᒃ ᐃᓄᑦᔪᐊᒥᐅᓂᒃ ᒪᒪᕐᑐᓂᒃ ᓂᕆᖃᑎᒌᕝᕕᐅᒍᓐᓇᓗᓂ. ᖃᓄᑐᐃᓐᓇᖅ ᐊᑐᕐᑕᐅᒍᓐᓇᖃᑦᑕᓛᕐᑐᖅ ᓂᕐᓯᐅᕕᒃ ᓂᕆᕕᖃᕐᓗᓂ ᑲᑎᒪᕕᐅᒍᓐᓇᓗᓂ 50-ᓂᒃ ᐃᓱᕐᕆᔪᓂᒃ ᐃᓄᑦᑕᖃᕈᓐᓇᓗᓂ.

ᓱᒧᑦ ᑖᓐᓇ ᐱᓇᓱᒐᖅ ᑲᔪᓯᒋᐊᖃᕐᒪᖔᑦ

ᓯᕆᕕᐅᑉ ᐅᓪᓗᒥ ᐃᓗᖁᑎᖓ ᐱᓇᓱᐊᕈᓐᓇᑕᑦᑎᓂᒃ ᐱᕕᑦᓭᓘᓚᕿᐅᑕᐅᕙᑦᑐᖅ

ᐅᓪᓗᒥ, ᐃᓂᖃᑦᓯᐊᐸᖕᖏᑐᖅ ᐃᑎᕐᓯᒪᑎᑦᓯᒋᐊᒥᒃ ᐃᓘᓐᓀᓂᒃ ᐊᑕᐅᓯᐅᑦᑎᑐᓂᒃ ᐱᓇᓱᐊᕈᑦᔨᐅᑎᑦᑎᓄᑦ ᐱᕕᑦᓴᖃᖃᑕᐅᒍᒪᔪᓂᒃ. ᑌᒣᒻᒪᑦ ᐸᔪᓐᓈᕙᓪᓗᒋᐊᖃᓲᒍᔪᒍᑦ ᑭᒡᒐᑐᕈᑎᑦᑎᓂᒃ ᐊᒻᒪᓗ ᓂᕐᓯᐅᓚᕆᕐᖃᔭᕐᐸᒐᑕ ᐃᓂᖃᑦᓯᐊᖏᒻᒧᑦ ᐊᒻᒪᓗ ᓂᓐᓂᐅᓱᑕ ᑭᓯᐊᓂᐅᕙᑦᓱᓂ.

ᐃᓪᓗᖁᑎᐊᐱᕗᑦ ᑖᕗᖓᓕᒫᖅ ᐊᑐᕐᖃᔭᓚᖓᒍᓐᓀᑐᖅ

ᐅᓪᓗᒥ ᐃᓪᓗᖁᑎᕗᑦ 50-ᐄᑦ ᐅᖓᑖᓄᑦ ᐅᑭᐅᖃᓕᕐᑐᖅ, ᐊᖏᓂᖓ 15×60 ᐃᑕᒉᑦ ᑲᓕᒐᐅᒍᓐᓇᑐᑦᓴᔭᕕᓂᖅ ᐋᕐᕿᓱᕐᑕᐅᒍᓐᓇᓕᕐᓱᓂ $1 ᒥᓕᐊᓐ ᐅᖓᑖᓅᕐᑐᑦ ᑮᓇᐅᔦᑦ ᐊᑐᕐᓗᒋᑦ ᑭᓯᐊᓂ.

84%-ᐃᑦ ᑕᓯᐅᔭᕐᔪᐊᒥ ᓄᓇᕕᒻᒥᐅᑦ ᓂᕆᔭᑦᓭᓘᕐᐸᑐᑦ

ᓄᓇᓕᓕᒫᓂ ᐱᒐᓱᐊᒻᒪᕆᓐᓇᐸᓕᕐᑑᒐᓗᐊᖅ ᓂᕆᔭᑦᓭᓘᕐᓂᖅ, ᑕᓯᐅᔭᕐᔪᐊᒥᐅᑦ ᐃᑉᐱᒋᔭᖃᓗᐊᖕᖑᐊᐸᑦᑐᑦ ᑖᑦᓱᒥᖓ ᐊᕐᓱᕈᓐᓇᑐᒥᒃ. ᑲᔪᓯᑎᓗᒍ ᑖᓐᓇ ᑲᒪᒋᐊᕈᑎᖃᕐᓯᒪᓂᖅ ᑭᓯᐊᓂᐅᓕᕐᑐᖅ.

ᑲᑐᑦᔮᖃᑎᖃᕐᓂᖅ ᓂᕿᓕᕆᓂᕐᒥᒃ ᐊᒻᒪᓗ ᓄᓇᓕᒥᐅᓕᕆᖃᑎᖃᕐᓂᖅ ᐱᕈᕐᓰᕕᒻᒥᒃ

ᐱᕈᕐᓰᕕᒃ ᐊᒻᒪᓗ ᐃᓄᐃᑦ ᑕᑯᒥᓇᕐᑐᓕᐅᕐᓂᖏᓐᓄᑦ ᐱᓇᓱᒐᖅ ᓄᐃᑕᐅᓯᒪᔪᖅ ᐱᐅᓯᐅᒥᑎᑦᓯᐅᑕᐅᒋᐊᕐᓱᓂ ᓄᓇᓕᓐᓂ ᐃᓗᓯᕐᓱᓂᕐᒥᒃ ᐊᒻᒪᓗ ᖃᓄᐃᖕᖏᓯᐊᕐᓂᒥᒃ. 2017-ᒥᑦ 2022-ᒧᑦ ᐱᓇᓱᒐᖅ ᐱᓇᓱᐊᕈᑕᐅᓯᒪᔪᖅ ᐊᑦᔨᒌᖕᖏᑐᓂᒃ ᐱᓇᓱᐊᕈᑦᔨᐅᑎᓂᒃ ᓲᖑᓯᑎᑦᓯᒋᐊᕈᑎᓂᒃ ᓂᕆᔭᑦᓴᖃᕐᑎᓯᓂᕐᒥᒃ ᐃᓄᑦᔪᐊᒥ ᐊᒻᒪᓗ ᓄᓇᓕᓐᓂ ᓂᕆᔭᑦᓴᓂᒃ ᐃᓂᕐᓯᓂᕐᒥᒃ ᓄᓇᕕᓕᒫᒥ.

ᑖᓐᓇ ᐱᓇᓱᒐᖅ ᐃᑲᔪᕐᓯᐅᑎᒋᔭᐅᓯᒪᔪᖅ One Drop Foundation-ᒧᑦ ᐊᒻᒪᓗ ᒪᑭᕝᕕᒃ ᑯᐊᐳᔦᓴᒧᑦ.

ᐱᕙᓪᓕᐊᑎᑕᐅᔪᖅ ᑖᓐᓇ ᐃᓱᕐᕆᐅᑎᒃ ᑲᔪᓯᑎᑦᓱᓯᓂᖏᓐᓄᑦ ᐱᓇᓱᐊᒻᒪᕆᓐᓂᒥᓂᒃ ᐱᕈᕐᓰᕕᒃ ᐱᓇᓱᒐᕐᒥ ᐱᓇᓱᐊᖃᑎᒌᑦ ᓄᐃᑦᓯᒋᐊᕈᑎᖃᕐᓂᒥᓄᑦ ᓄᓇᓕᓐᓂ ᐱᕈᕐᐸᓕᐊᔫᑉ ᐃᓱᕐᕆᐅᑎᐅᑉ ᐃᓄᑦᔪᐊᒥ.

ᑮᓇᐅᔭᕐᓯᐅᕈᑦᔨᓂᖅ ᐊᒻᒪᓗ ᐱᓇᓱᒐᐅᑉ ᐱᕕᑦᓴᖓ

ᐅᓪᓗᒥ ᒥᑦᓴᐅᓵᕈᑎᓕᐅᕐᑕᐅᓯᒪᔪᖅ ᐃᓪᓗᖅ $7 ᒥᓕᐊᓂᒃ ᐊᑭᖃᕋᔭᕐᑎᓗᒍ.

ᑐᕌᒐᕗᑦ ᐱᒻᒪᕆᒋᐊᓛᕐᓱᑕ 2023 ᐊᐅᔭᖓᓂ, ᐅᒃᑯᐃᑕᐅᓚᕿᑐᑎᓗᒋᑦ ᐅᒃᑯᐊᖏᑦ ᓄᑖᑉ ᐃᓱᕐᕆᐅᑎᐅᑉ 2024 ᐅᐱᕐᖔᖓᓂ.

ᑮᓇᐅᔭᕆᒋᐊᓕᖏᓐᓂᒃ ᐁᑦᑐᑕᐅᑐᐃᓐᓇᕆᐊᖃᕐᑑᔮᓕᕐᓱᑕ, ᑭᓯᐊᓂ, ᓱᓕ ᑎᑭᕝᕕᒋᓪᓗᑐᕋᑕᖕᖏᑕᕗᑦ. ᑲᒪᖃᑕᐅᒍᒪᒍᕕᑦ ᐃᑲᔪᕐᓯᓗᑎᑦ ᐱᓇᓱᒐᕐᒥᒃ, ᐅᕝᕙᓘᓐᓃᑦ ᖃᐅᔨᒋᐊᓪᓚᕈᒪᒍᕕᑦ ᐱᓇᓱᐊᖃᑎᒌᑦᑎᑎᓐᓂᒃ ᐅᖄᕕᖃᕐᑌᓕᐊᐱᑦᔭᖏᑦᑐᑎᑦ.